توبه.. عبدالله السايح.. زهرة القصيد
...........( توبه ). ..........
غلطة وكانت مش محسوبة
لما عشقت وطلع العشق معاك أكذوبة
شوفت الفرح معاك يلاحقني
شوفت سعادة وراكبة القلب ماتعرف عيبة
شوفت البسمة معاك بتسوقني
فوق الشفة نفسها انها لحظة تدوقني
كنت أخبي الفرحة وخايف لحظة تسوئني
رغم وكان القلب تملي يبان ترغيبه
بس تملي وكنت بخاف
بكره يجيني تقول لي عواف
في طوبة النوم مايلاقي لحاف
يظهر برد الشتا من تاني وألاقي عيوبه
كنت أخاف من بكره يجيني ويسرق يومي
عيشت أستنى ف وسط همومي
كنت أقول لك عيشي اللحظة حتى ف نومي
وانا في لباس الخوف ألاقيني بقول النوبه
بس النوبة واحاول أعيش اللحظة معاك
يوم بيعدي ومركب عشقي يسوقها هواك
شايفك ديما كل النسا والحلم رؤاك
عيشت معاك وقلت جمال الشوق تعزيبه
كنت بشوفك زي شعاع الشمس في كل صباح
قلبي يدندن همس ف همس وعاش مداح
عمر ماشمسك لحظة وغابت ع الأفراح
بس الخوف من بكره تملي وكان لي عيوبه
توهت مابين الشمس ونورها
مابقتش اعرف شمسي بتطلع والا قمرها
قولت لنفسي إركب قطر الفرح وزورها
بس لقيت القطر بفرحة دخل غيبوبة
قطر الحب بيمشي تملي ولايوصلشي
باقي محطة ولازم اوصل مابيحصلشي
قلت احاول وقلت لقلبي ماتتأثرشي
ولما وصلت لقيت الشمس بتعلن توبه
شعر.
عبدالله السايح
تعليقات
إرسال تعليق